«Бяспечныя канікулы» ў раёнах Гродзеншчыны
Актыўная фаза інфармацыйна-прапагандысцкай акцыі " «Бяспечныя канікулы» праходзіць ва ўсіх раёнах Прынёмання. Каб прадасцерагчы маладое пакаленне ад небяспек, выратавальнікі праводзяць пазнавальныя сустрэчы і тэматычныя заняткі.
Работнікі Ашмянскага раённага аддзела МНС наведалі прышкольны лагер на базе Барунскай сярэдняй школы. Прадстаўнік службы «101» нагадаў дзецям, як дзейнічаць у розных экстрэмальных сітуацыях, нагадаў, нумары выкліку службы выратавання.
Навучальныя заняткі па пажарнай бяспецы прайшлі з выхаванцамі дзіцячых садоў № 1, 3 горада Масты.
Работнік раённага аддзела МНС нагадала малым правілы бяспечных паводзін дома і на вуліцы. Прагаварыла нумары тэлефонаў экстраных службаў рэагавання і што рабіць, калі патрапіў у бяду.
– Гуляць з запалкамі небяспечна. Калі ўбачылі пажар, адразу ўцякайце з памяшкання. Галоўнае правіла – нідзе не хавацца і адразу тэлефанаваць выратавальнікам па нумарах 101 або 112, – навучыла прадстаўнік МНС.
На памяць аб сустрэчы юнакі і дзяўчаты атрымалі маляўнічыя налепкі і размалёўкі.
Работнікі Зэльвенскага раённага аддзела па надзвычайных сітуацыях арганізавалі для выхаванцаў дашкольнага цэнтра развіцця гарадскога пасёлка незабыўную прыгоду, пагрузіўшы іх у захапляльны свет правіл бяспекі.
У гульнявой форме дзеці вывучалі правілы бяспекі дома, даведаліся, чым небяспечны агонь, патрэніраваліся выклікаць выратавальнікаў у выпадку небяспекі.
Інспектар раённага аддзела МНС Кацярына Бялько расказала аб самых распаўсюджаных прычынах узнікнення пажараў і растлумачыла, як іх пазбегнуць.
Асаблівая ўвага была нададзена бяспецы на вадаёмах у летні перыяд. Хлопчыкам і дзяўчынкам нагадалі правілы паводзін на рэках і азёрах, растлумачылі, чаму нельга купацца ў незнаёмых месцах і як бяспечна бавіць час каля вады.
– Маляняты могуць знаходзіцца ў вадзе толькі, калі побач ёсць бацькі. Нельга плаваць на надзіманых матрацах і колах, яны могуць садзьмуцца ці перавярнуцца, – перасцерагла дзятву інспектар МНС.
Дзень бяспекі стаў для дзяцей не толькі пазнавальным, але і вельмі вясёлым. Яны з задавальненнем удзельнічалі ў гульнях, адказвалі на пытанні віктарыны і з цікавасцю слухалі апавяданні выратавальнікаў.
