Сёння нечаканыя віншаванні атрымалі былыя вязні канцлагераў Ніна Мілідовіч, Ніна Маргуж, Соф’я Палуян, Еўдакія Сігалёва, Таццяна Волкава, а таксама былы старшыня райсавета ветэранаў Расціслаў Герт. Да іх у межах рэспубліканскай дабрачыннай акцыі «Ад усёй душы» завіталі прадстаўнікі тэрытарыяльнага цэнтра, савета ветэранаў і райкама ГА БРСМ у кампаніі з прафсаюзнай Снягуркай цэнтральнай раённай клінічнай бальніцы. Падарункі падрыхтавалі таксама райкамы прафсаюза АПК і адукацыі.
Госці віншавалі з Новым годам і Ражаством, жадалі здароўя, добрага настрою і аптымізму. Канешне, не абышлося без падарункаў, якія падрыхтавалі наведвальнікі аддзялення для маладых інвалідаў ТЦСАН, раённае аддзяленне ГА «Белая Русь», раённы савет ветэранаў і моладзь Астравеччыны. А Еўдакія Сігалёва папрасіла праспяваць яе любімую песню «Кацюша» – і гэтую просьбу выканалі.
У адказ госці, вядома, чулі шчырае дзякуй за сюрпрыз і ўвагу, а таксама пажаданні міру і шчасця.
